लाहे ग्रामपंचायतीच्या कारभाराचा हिशोब मागण्यासाठी श्रमजीवी संघटनेचा मोर्चा
लाहे ग्रामपंचायतीच्या कारभाराचा तसेच विविध विकासकामांसाठी प्राप्त झालेल्या निधीच्या खर्चाचा हिशोब मागण्यासाठी श्रमजीवी संघटनेच्या वतीने लाहे ग्रामपंचायतीवर हिशोब मोर्चा काढण्यात आला.
या मोर्चात लाहे ग्रामपंचायत हद्दीतील शेकडो संघटनेचे सभासद, ग्रामस्थ आणि आदिवासी नागरिक सहभागी झाले.
कातकरी वस्ती आणि मोहंडुळपाडा येथील नागरिकांना आजही रस्ता, पाणी, वीज, घरकुल, स्वच्छता, रोजगार, शिक्षण आणि आरोग्य यांसारख्या मूलभूत सुविधांसाठी संघर्ष करावा लागत असल्याचा मुद्दा यावेळी उपस्थित करण्यात आला.
आदिवासी नागरिकांच्या विकासासाठी उपलब्ध झालेला निधी अपेक्षित ठिकाणी खर्च न करता इतरत्र वळवण्यात आल्याचा ग्रामस्थांनी आरोप केला असून, संबंधित निधीचा संपूर्ण हिशोब सार्वजनिक करण्याची मागणी करण्यात आली.
श्रमजीवी संघटनेने २०२३ ते २०२६ या कालावधीत ग्रामपंचायतीला प्राप्त झालेला निधी, मंजूर विकासकामे, प्रत्यक्ष खर्च, कामांची सद्यस्थिती, आदिवासी विकासासाठी झालेला खर्च, विविध शासकीय योजनांचा निधी व लाभार्थींची माहिती तसेच ग्रामसभेचे ठराव यांचा तपशील मागितला.
मोर्चाची दखल घेत पंचायत समिती शहापूरचे गटविकास अधिकारी श्री. राठोड यांनी संबंधित बाबींवर चौकशी सुरू असल्याचे सांगितले. ३१ ऑगस्ट २०२६ पर्यंत चौकशी करून अहवाल सादर केला जाईल, तसेच चौकशीत सरपंच किंवा ग्रामसेवक दोषी आढळल्यास नियमानुसार कायदेशीर कारवाई करण्यात येईल, असे लेखी आश्वासन देण्यात आले.
