📍शिरूर अनंतपाळच्या अभूतपूर्व यशानंतर उद्या देवणीत भरणार खासदार डॉ. शिवाजी काळगे यांचा 'जनता दरबार'!* *आ. अमित देशमुख यांच्या सूचनेनुसार जिल्हाभर मोहिमेला वेग; सर्वसामान्यांचे प्रश्न जागेवरच सुटणार* लातूर: राज्याचे माजी वैद्यकीय शिक्षण मंत्री तथा काँग्रेस विधिमंडळ पक्षाचे मुख्य प्रतोद आ. अमित विलासराव देशमुख यांच्या विशेष सूचनेनुसार आणि लातूर जिल्हा काँग्रेस कमिटीचे अध्यक्ष अभय साळुंके यांच्या पुढाकारातून, लातूरचे खासदार डॉ. शिवाजी काळगे यांचा संपूर्ण जिल्ह्यात 'जनता दरबार' आयोजित करण्यात येत आहे. या मोहिमेचाच एक महत्त्वाचा भाग म्हणून उद्या, दिनांक १७ ऑगस्ट रोजी दुपारी १ वाजता देवणी येथील तहसील कार्यालयात या 'जनता दरबारा'चे आयोजन करण्यात आले आहे. शिरूर अनंतपाळमधील 'जनता दरबारा'चे घवघवीत यश सर्वसामान्यांचे प्रशासकीय पातळीवर रखडलेले प्रश्न आणि अडीअडचणी लोकदरबारी तात्काळ सोडवण्याच्या उद्देशाने या महत्त्वपूर्ण मोहिमेची सुरुवात १६ जुलै रोजी शिरूर अनंतपाळ येथून करण्यात आली होती. तालुक्याच्या इतिहासात पहिल्यांदाच एखाद्या खासदाराने थेट जनतेच्या बांधावर येऊन दरबार घेतल्याने, तेथे नागरिकांचा अभूतपूर्व महापूर लोटला होता. या पहिल्या दरबारात खा. डॉ. शिवाजी काळगे यांनी अत्यंत आत्मीयतेने नागरिकांचे म्हणणे ऐकून घेतले होते. महसुली अडचणी, शेतीचे प्रश्न आणि वैयक्तिक तक्रारींवर त्यांनी थेट तहसील कार्यालयातील अधिकाऱ्यांना जाब विचारत, "सामान्य माणसाला हेलपाटे मारायला लावू नका, त्यांचे प्रश्न नियमानुसार त्वरित मार्गी लावा," असे सक्त निर्देश जागेवरच दिले. यामुळे अनेक प्रलंबित प्रश्नांना वाचा फुटली आणि नागरिकांना मोठा दिलासा मिळाला. या दरबाराला काँग्रेसचे अनेक प्रमुख पदाधिकारी उपस्थित होते. प्रशासकीय लालफितीला चाप आणि जनतेला दिलासा लातूर जिल्ह्यातील सर्वसामान्य जनता, शेतकरी आणि कष्टकरी वर्गाचे अनेक प्रश्न प्रशासकीय पातळीवर लालफितीत अडकून पडतात. तळागाळातील माणसाला न्याय मिळावा आणि सरकारी कार्यालयांमध्ये त्यांना खेटे मारावे लागू नयेत, या उदात्त विचारातून आ. अमित देशमुख यांनी संपूर्ण जिल्ह्यात 'जनता दरबार' घेण्याची संकल्पना मांडली. जिल्हा काँग्रेस कमिटीचे अध्यक्ष अभय साळुंके यांच्या कुशल नियोजनातून ही मोहीम आता संपूर्ण जिल्हाभर अधिक ताकदीने राबवली जात आहे. नागरिकांना मोठ्या संख्येने उपस्थित राहण्याचे आवाहन देवणी आणि परिसरातील नागरिकांचे प्रशासकीय पातळीवरील प्रलंबित प्रश्न सोडवण्यासाठी उद्याचा हा 'जनता दरबार' एक मोठी संधी ठरणार आहे. आ. अमित देशमुख यांच्या मार्गदर्शनाखाली राबविण्यात येणाऱ्या या उपक्रमामुळे देवणी तालुक्यातील जनतेलाही मोठा दिलासा मिळेल, असा विश्वास व्यक्त केला जात आहे. उद्या, १७ ऑगस्ट रोजी देवणी तहसील कार्यालयात होणाऱ्या या जनता दरबारात परिसरातील सर्वसामान्य नागरिक, शेतकरी आणि महिलांनी आपल्या समस्या मांडण्यासाठी मोठ्या संख्येने उपस्थित राहावे, असे जाहीर आवाहन लातूर जिल्हा काँग्रेस कमिटीच्या वतीने एका अधिकृत प्रसिद्धी पत्रकाद्वारे करण्यात आले आहे.