ଖଣ୍ଡବନ୍ଧ ଅଞ୍ଚଳରେ ଧାନ ବିହନକୁ ନେଇ ଚାଷୀଙ୍କ ଅଭିଯୋଗ, ତଦନ୍ତ ଦାବି
ଢେଙ୍କାନାଳ : ଚଳିତ ବର୍ଷ ଧାନ ଚାଷ ପାଇଁ ସମବାୟ ସମିତିରୁ ମିଳିଥିବା ଧାନ ବିହନକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ। ଖଣ୍ଡବନ୍ଧ ଅଞ୍ଚଳର ଜଣେ ଚାଷୀ ନିଜ ଧାନ କ୍ଷେତର ଭିଡିଓ ପଠାଇ ବିହନର ଗୁଣବତ୍ତା ନେଇ ଅଭିଯୋଗ ଆଣିଛନ୍ତି।
ଚାଷୀଙ୍କ ଅଭିଯୋଗ ଅନୁଯାୟୀ, ସେ କାଶୀପୁର ସମବାୟ ସମିତିରୁ ସ୍ୱର୍ଣ୍ଣ ଧାନ ବିହନ ନେଇ ଚାଷ କରିଥିଲେ। କିନ୍ତୁ ଧାନ କ୍ଷେତରେ ଗଛଗୁଡ଼ିକର ଉଚ୍ଚତା ଓ ବୃଦ୍ଧିରେ ଅସମାନତା ଦେଖାଦେଇଛି। କେତେକ ଧାନ ଗଛ ବଡ଼ ହୋଇଥିବା ବେଳେ ଅନ୍ୟ କେତେକ ଗଛ ଛୋଟ ରହିଛି। ଏପରିକି କେତେକ ଗଛରେ ଧାନ କେଣ୍ଡା ବାହାରିଥିବା ବେଳେ ଅନ୍ୟ କେତେକ ଗଛରେ ଏପର୍ଯ୍ୟନ୍ତ କେଣ୍ଡା ବାହାରିନାହିଁ।
ବିହନରେ ଭିନ୍ନ କିସମର ଧାନ ମିଶିଥିବାରୁ ଏଭଳି ସମସ୍ୟା ହୋଇଥିବା ଚାଷୀ ଆଶଙ୍କା କରୁଛନ୍ତି। ତେବେ ଏହାର ପ୍ରକୃତ କାରଣ ତଦନ୍ତ ପରେ ହିଁ ସ୍ପଷ୍ଟ ହେବ।
ଏହି ଘଟଣାକୁ ଗୁରୁତ୍ୱ ଦେଇ ଜିଲ୍ଲା କୃଷି ବିଭାଗ ଓ ସମବାୟ ବିଭାଗ ପକ୍ଷରୁ ଧାନ କ୍ଷେତର ଯାଞ୍ଚ କରିବା ସହ ବିହନର ଗୁଣବତ୍ତା ଓ ଶୁଦ୍ଧତା ଯାଞ୍ଚ କରାଯାଉ ବୋଲି ଦାବି ହେଉଛି। ତଦନ୍ତ କରି ଚାଷୀଙ୍କ ସମସ୍ୟାର ସମାଧାନ ଏବଂ ଆବଶ୍ୟକ ପଦକ୍ଷେପ ନେବାକୁ ସମ୍ପୃକ୍ତ ବିଭାଗ ନିକଟରେ ଦାବି ରହିଛି।
News Odia Odisha | ଖବର ଆପଣଙ୍କର, ନଜର ଆମର।
